Христос се роди!

Ликовите од Псково-Печерската обител

Свето-Успенскиот Псково-Печерски манастир бил основан пред повеќе од 500 години. За време на жестоките советски прогонувања во ХХ век, тој беше единствениот машки манастир на територијата на СССР, кој не беше затворен од  болшевиците. Благодарејќи на тоа, манастирот не само што ја сочува древната монашка традиција, но исто така во себе го собра и цветот на руското старчество. Во втората половина на XX век во овој манастир се подвизуваа сега веќе прославените во ликот на светиите еросхимонах Симеон (Желнин), архимандрит Јован (Крестјанкин), архимандрит Алимпиј (Воронов), схиархимандрит Агапиј (Агапов), схиигумен Сава (Остапенко), валаамските старци и многу други подвижници во благочестието.

Следат фотографии, кои ќе ви го стоплат срцето, подготвени од порталот www.pravoslavie.ru. Поголемиот дел од фотографиите се дело на Анатолиј Горјаинов.

Архимандрит Натанаил (Поспелов), ризничар на Псково-Печерскиот манастир

Поука за почитување на свештениците – Св. Николај Велимировиќ

Браќа, почитувајте ги своите свештеници. Тие се слуги Христови и претставници на апостолите Христови. Нивната служба е тешка и нивната одговорност пред Бога е огромна. Тие се молат на Бога за сите нас. Тие со своите раце и молитви ја подготвуваат светата Причест, преку која вие се соединувате со Бога. Тие ве дочекуваат кога се раѓате, тие ве испраќаат кога ќе умрете. Тие за вас пред Бога одговараат.

Св. Сава рекол: „Ако попот е грешен, неговата молитва не е грешна“. Не осудувајте го својот свештеник, не омаловажувајте го, не гонете го. Тој за своите гревови ќе одговара пред Бога повеќе отколку вие за вашите, затоа што е свештеник на живиот Бог. Ако свештеникот е грешен, почитувај го и со почитта ќе го засрамиш и тој ќе се поправи. Но ако го осудуваш и омаловажуваш, тој ќе стане уште полош. Браќа, почитувајте ги своите свештеници.

За осудувањето – Старец Сава Псково-Печерски

Светата Црква нé моли и предупредува: „Не судите за да не ви се суди!“ Особено во никој случај не треба да се осудуваат свештениците. 21-вото правило на IV Вселенски Собор гласи: „Од клирот или мирјаните кои имаат поплаки против епископите или клириците, не треба да се прифаќаат поплаките без проверка, туку прво треба да се испита јавното мнение за нив.“

Заради порокот на осудување, човек може да стане пијаница, блудник или дури и разбојник, затоа што тој грев кој ние го забележуваме и осудуваме кај ближните, задолжително и нам во иднина ќе нé заведе.

Чеда! Избегнувајште го осудувањето. Осудувајќи некого, ние повторно Го распнуваме Господа и Светиот Дух го гониме од себе.

А и кој си ти кој си се дрзнал да го осудуваш својот ближен? Ако Господ го гледа безаконието на грешникот и не го казнува, туку трпи, кој тогаш ни дал нам право да го судиме (тој грешник)? Бидејќи ако го одземеме од Господа чинот на Судија, тогаш ние стануваме антихристи т.е. противници Божји.

Благочестивиот монах Евтимиј…

…бил надарен од Господа со дарот на прозорливоста. Двајца братја се дружеле, но не духовно, и се договориле тајно да го напуштат манастирот. За време на литургија, Евтимиј погледнал кон псалтите и видел како страшен влакнест етиопиец се обдиува со кука да ги фати двајцата братја на клиросот. Куката се откачила, но тој повторно и повторно се обидувал да ги закачи одеждите на братјата. Етиопиецот неколку пати исчезнувал и повторно се појавувал, додека сосема не исчезнал за време осветување на Светите Дарови. Треперејќи, старецот го видел сето тоа, а после службата го раскажал на преподобниот Пафнутиј Боровски. Преподобниот ги повикал двајцата монаси и кротко ги разобличил, а тие се покајале, признале сé и се поправиле.